Nyaruguru: AMI yakanguriye urubyiruko kwirinda ibiyobyabwenge n’ibinyobwa bitemewe
Mu rwego rwo gukumira ibiyobyabwenge, ibinyobwa bisindisha bitemewe n’imyitwarire ishobora guteza urubyiruko ibibazo birimo n’ubuzererezi, Association Modeste et Innocent (AMI), ku bufatanye n’ubuyobozi bw’Akarere ka Nyaruguru, mu Murenge wa Cyahinda, binyuze mu mushinga Ikaze mu banyu watewe inkunga na Eirene Suisse, yakoze ubukangurambaga bukangurira urubyiruko kubyirinda.
Iki gikorwa cyibanze ku gusobanurira urubyiruko ingaruka ziterwa no kunywa ibinyobwa bisindisha bitemewe, gukoresha ibiyobyabwenge ndetse n’imyitwarire ibangamira imibereho myiza y’urubyiruko n’iterambere ry’umuryango.
Umuyobozi ushinzwe Imari n’Ubutegetsi muri AMI, Eric NDAYISABA, yasabye urubyiruko kwirinda ibiyobyabwenge n’ibinyobwa bisindisha bitemewe, kuko bishobora kubangamira ubuzima, imyigire, imibanire n’abandi ndetse n’ejo hazaza harwo. Yabashishikarije kugira uruhare mu gukumira imyitwarire mibi, kubaha amategeko no gukoresha neza amahirwe yo kwiga, rugakora, rukiteza imbere.
Umuyobozi ushinzwe Urubyiruko mu Karere ka Nyaruguru, we yasabye urubyiruko kwirinda imyitwarire mibi ishobora kubasubiza mu bigo ngororamuco cyangwa kubakururira ibindi bibazo.
Yabashishikarije gukoresha neza amahirwe bafite, kugira indangagaciro nziza, kubaha amategeko, no kugira uruhare mu bikorwa by’iterambere ry’umuryango n’igihugu.
Yabasabye kandi kujya baganira n’ababyeyi, abayobozi n’abandi bafite uruhare mu kurera urubyiruko igihe bahuye n’ibibazo, aho kwishora mu bikorwa bishobora kubagiraho ingaruka mbi.
AMI yagaragaje ko gukumira ibiyobyabwenge n’ibinyobwa bitemewe ari ingenzi mu kubaka urubyiruko rufite ubuzima bwiza, indangagaciro nziza n’ubushobozi bwo kugira uruhare mu iterambere ry’aho rutuye.