France: AMI yitabiriye ibiganiro Dialogue avec la Communaute Rwandaise en Europe
Ku wa 21 Gashyantare 2026, i Paris mu Bufaransa, Jean de Dieu Uwizeye, umukozi w’Umuryango Association Modeste et Innocent yitabiriye ibiganiro byiswe Dialogue avec la Communauté Rwandaise en Europe.
Ibi biganiro byahuje Abanyarwanda baba mu Bufaransa no mu bindi bihugu by’u Burayi, byitabirwa n’abiganjemo urubyiruko rufite ubushake bwo gutanga umusanzu wabo mu kubaka ejo hazaza h’u Rwanda.
Ibi biganiro byibanze ku gushimangira ubumwe, ubudaheranwa no kwimakaza amahoro arambye mu Banyarwanda. Byateguwe na Minisiteri y’Ubumwe bw’Abanayarwanda n’Inshingano Mboneragihugu ku bufatanye n’Ambassade y’u Rwanda mu Bufaransa, ndetse n’umuryango Interpeace.
Jean de Dieu Uwizeye yatanze ubuhamya ku rugendo rwe rwo gukira ibikomere by’umutima no guhinduka abikesha gahunda ya Ndi Umunyarwanda. Yasobanuye uko iyo gahunda yamufashije guhangana n’amateka amubabaza, kurenga amacakubiri no kwemera no kwiyakira ashingiye ku ndangagaciro z’ubunyarwanda dusangiye. Ubuhamya bwe bwakoze ku mitima y’abitabiriye ibi biganiro, cyane cyane urubyiruko, bubashishikariza guteza imbere ibiganiro byubaka, kumvikana no gufata inshingano aho batuye hose.
Minisitiri w’Ubumwe bw’Abanyarwanda n’Inshingano Mboneragihugu Jean-Damascène Bizimana, yashimye imiryango nka AMI ku ruhare rwayo, mu kubaka amahoro arambye.
Ibi biganiro byashimangiye ko buri Munyarwanda afite inshingano zo kurinda no gusigasira ibyiza u Rwanda rwagezeho mu bumwe n’ubwiyunge.